今晚德乙獨腳戲，杜伊斯堡同羅斯托克都係由德甲降班，不過事隔兩個幾月，兩隊都人面全非，不過一隊換血一隊失血，杜伊斯堡洗心革面徹底重組，使唔少錢搜羅猛將加盟，擺明有決心打升班戰，今晚主場面對實力比上季大為削弱羅斯托克，杜伊斯堡只讓平手、半球，黑柴捧上盤。（周二凌晨2時15分開賽）
睇杜伊斯堡今季份名單，真係以為睇錯球隊名，佢基本上成隊主力球員都換晒，新加盟球員竟然達到十七人，呢班新兵當中，好多個級數仲勁過上季舊人，包括來自拜仁辛特華拿同紐倫堡歷基艾拿，呢兩位都係德甲公認潛質優厚年輕鋒將，中場最猛料係由禾堡來投馬基亞迪同哈化艾迪，而防線亦買到上季多蒙特不乏上陣機會比辛斯卡。黑柴相信佢有能力用一季時間重返甲組，雖然人腳變動大需要時間適應，但球隊季前熱身賽表現出色，德國盃亦大勝晉級，今晚聯賽首仗主場出師，有足夠條件打響頭炮。
羅斯托克畀人清倉
羅斯托克亦有多名主力他投，但佢唔係主動換血，而係畀人挖角，上季正選球員包括艾加利、夏恩治、沙普薩特、薩巴斯坦、麥克史甸同埋拉迪維斯等，分別畀卡爾斯魯厄、哈化柏林同法蘭克福等甲組隊瓜分，老將邊列治亦因傷退役，最慘係荷包乾涸，新加盟球員只有兩人，分別係來自丹超列托夫同埋不來梅二隊小將舒軒拿，陣容無論質同量都削弱，根本冇條件打升班戰。何況全隊唯一具級數前漢堡門將韋治達長期受傷仲未好番，作客對杜伊斯堡凶多吉少
