新球季又開鑼，雖然度士今季榮升晨曦頭之一，不過絕對唔會影響我刨波，事關正式做球隊練後，為取長補短，度士更要睇多其他比賽，學其他外國練點樣調兵遣將，所以度士今季唔會好似上季咁局限自己意甲波，今日就睇中一場德甲史浩克04主場對漢諾威，推介入球「大」。（有線球彩台64周六晚９時30分直播）
史浩克04今季搵前川迪練魯頓執，而且佢仲帶埋愛將安格拿及從燕豪芬羅致前鋒法芬，陣容全面荷蘭化。荷甲一向踢開進攻足球，度士相信史浩克04今季踢法會比以往更進取。
漢諾威有鬥攻本錢
度士今季都係重新接手一支球隊，深知季初贏波對球員往後比賽信心好重要，剛過去周中歐聯外圍賽第三圈首回合，史浩克主場以一比○擊敗實力不俗馬德里體育會，足證狀態唔錯，今場係德甲首輪比賽，當然想憑主場之利打響頭炮，博取球迷歡心。
漢諾威上季聯賽排第八，成績不過不失，呢隊波畀度士最深刻印象係佢有前冇後踢法，作客曾經分別輸畀雲達不來梅一比六及科特布斯一比五，但主場又可以贏番不來梅四比三，正宗入得又失得。佢今季從拜仁羅致前鋒舒拿達夫及從伯明翰簽入冰島射手科素，攻力比上季更強大，就算作客亦有搶攻本錢，今場捧「大」最好路。
