今晚英超開鑼，共有七場Show上演。頭場有阿仙奴主場對西布朗。阿仙奴今季進一步年輕化，從季前熱身賽睇，整體實力未見影響。以「兵工廠」上季主場不敗威力，西布朗爆冷機會甚微，但主W冇肉食，「讓球主勝」又有一定風險，樂比仔建議捧入球大。（now 632周六晚7時45分直播）
阿仙奴有前冇後
阿仙奴今季放走門將列文、中場法米尼、基拔圖施華同希比，補充番拿斯尼、艾朗藍斯同卡路士韋拿等小將，平均年齡比上季更年輕。雖然一班小將熱身賽表現落力，但熱身賽同正式比賽係兩回事，一眾新人能否咁快入局，克服壓力發揮水準，樂比仔對此稍有保留。
事實上，阿仙奴今仗陣容非常不整，傷兵名單之中，包括高路托尼、辛德路斯、法比加斯、戴亞比、路斯基及伊度亞度達施華等主力。其中以後防高路托尼同辛德路斯缺陣影響較大，冇兩個高大中堅，阿仙奴今仗失波並唔出奇，幸好前線攻力可保持，新加盟拿斯尼可趕及復出，配合尹佩斯同艾迪巴約攻堅，攻力有一定保證。
西布朗鋒線唔曳
西布朗今季人腳有增無減，升班功臣僅老將菲臘斯離隊，補充門將卡臣、荷蘭後蘇華隆、前保頓中堅美迪及前維拉射手勞基摩亞，不過蘇華隆同勞基摩亞兩名新兵今仗都唔出得。
西布朗係上季英冠入球率最高球隊，兩名前鋒伊斯美米拿同貝特拿上季表現出不俗入球能力，要唔算穩健阿仙奴防線入波唔太難，與其博阿仙奴大勝，不如博佢失波，捧大盤較「讓球主勝」划算
