英超開鑼日，當然吸引唔少投注者參與，所以外地莊家都各出奇謀，紛紛增設特別玩法，吸收新客戶。好似William Hill就提供「英超第一紅」玩法，結果素來有「暴力般」之稱布力般流浪，與升班馬西布朗成為大熱，被指最大機會奪得今季英超首面紅牌！
「最快見紅」有得估
比起香港，外國投注者可謂幸福得多，皆因足球博彩玩法層出不窮，尤其係今季英超開鑼日，「特別投注」特別多。其中William Hill提供邊支球隊會到今季首面紅牌，布力般與西布朗都以13倍成大熱，緊隨其後係另外兩支升班馬侯城及史篤城。不過，論到全季牌最多球隊，bwin就開出米杜士堡以6倍成大熱，布力般7倍列第二。
另外，Skybet亦開出盤口畀一班新加盟球員，投注者可估開鑼日有幾多位新球員入波，中位數係3.5位，而佢合共可以入幾多球，中位數就係4.5球，即管睇下高治、拿斯尼及艾文達等貴價貨幫唔幫到手。
羅比堅尼設特別盤口
至於身價高達一千八百萬鎊羅比堅尼，亦被William Hill開出佢首個利物浦入球會幾時出現，今日面對新特蘭會係2.5倍，而下場對米杜士堡就係3.25倍，如果整個九月都入唔到波，就有7倍咁多。
