相隔一百零四年先重返頂級聯賽侯城，季前熱身賽表現完全唔掂，開鑼戰撞正有晒英超求生經驗富咸，論人腳同級數都輸成條街，就算有地利都難寄厚望，2.68倍客勝唔捧等幾時？（now633台周六晚10:00直播）
「老虎」侯城季前七場熱身賽贏得兩場，當中對住英甲克魯都要吞四蛋，狀態認真差到得人驚。最弊係班波本身鋒力唔強，暑假又斟唔掂車仔比沙路同奧沙辛拿彭迪安尼，再加上首席射手費沙甘保又返曼聯，隊長伊恩艾殊比講到明新季都係要靠三十九歲韋達斯衝鋒陷陣，都咪話唔濕滯！
侯城對甲組仔都吞4蛋
反觀上季死逃生富咸，今夏就大事增兵，雖然安祖莊臣因傷未必出得，不過初到右翼謝拉同射手森莫亞近期友賽頻頻建功，鋒力肯定比上季有過之而無不及。再講，中堅軒治蘭特獲委任為挪威國家隊隊長，呢單消息絕對有沖喜作用，加埋個出名穩陣舒華沙把關，有前有後點秤都高過侯城啦！
