今晚德乙場獨腳戲係咪似曾相識呢？之唔係由杜伊斯堡同羅斯托克兩支今季先降落乙組球隊交手。由於杜伊斯堡有錢，今季落難都執到唔少筍貨，最近仲兩連勝喪入十一球，表現極之對辦，主場出擊當然值得睇高一線啦！（開賽時間：周二凌晨2:15）
杜伊斯堡今季雖然以二百萬歐元高價賣走主力射手伊舒亞古，不過佢反而用呢筆錢轉會市場上吸納到唔少好手加盟，當中包括拜仁慕尼黑小將辛度華拿，以及多蒙特守將比辛斯卡等。
羅斯托克冇乜增兵
早前杜堡踢德盃第一圈，就憑辛度華拿梅開二度，作客五比一大勝貝格多夫，上場熱身賽亦送華登舒特半打蛋，狀態可謂弗到漏。
羅斯托克係上季德甲入波最少球隊，今季降落乙組後，前線依然冇乜增兵，日前德盃作客弱旅基爾，都只係僅勝二比○，鋒力咁曳，作客大勇杜堡睇怕目標都只係求破蛋！
