呢個暑假真係熱鬧，由朝到晚都有奧運賽事睇，撞正歐洲聯賽又開咧，搞到Mandy全天候坐個電視前面，畀Daddy鬧我十足十廢人一樣。冇計啦，鬼叫我男仔頭鍾意運動咩，況且奧運四年一次，點計都應該撐自己國家啦？
歐塞爾作客唔掂
前幾日睇中國男籃，一位女歌手電視上竟話自己細細個就鍾意姚明，聽到Mandy眼都突埋。大佬呀！姚明都係呢幾年先彈起，你不如話細細個就鍾意「Cream」個李蘊！講開又講，其實Mandy細細個就好鍾意馬賽，一來件湖水藍波衫夠靚，二來當年有皮利斯同杜加利兩位型仔力，所以Mandy到依家都仲好留意呢支法國老牌球會。
馬賽季前簽入賓艾化、高尼同文丹達一班高質球員，開鑼戰同雷恩打成四比四證明火力夠晒猛，今晚返主場對住作客不嬲唔掂歐塞爾，主勝相信冇甩拖！
