今個星期開始，周六戰線可以提早，因為又多一個聯賽─A-League「澳洲職業足球聯賽」加入有線球彩台直播行列，而我亦係澳職直播主力之一添！初試啼聲，就貼場直播波FC悉尼對墨爾本勝利，希望幫大家贏番多少。（有線64周六下午5:00直播）
主隊FC悉尼季初都幾慘，今場受傷、停賽加埋去踢奧運，有成九個常規球員缺陣。睇近況，佢季前盃賽居然分組賽排尾二，三場波輸兩場，連上季包尾威靈頓鳳凰都贏唔到！
澳職主勝率偏低
澳職有個幾特別情況，原來主場都無咩特別優勢，近三季主勝比率，平均都只係得三成七。主場成績曳，更唔少得FC悉尼份，上年佢十一場主場只得三勝，以主場成績計，全個「咧」排尾三。盤口上，今場縱有主場之利都只係開平手盤，平半都做唔到，所以就算呢場係主場都捧唔過。
墨爾本勝利季前狀態唔錯，踢四場有兩勝一和一負，先贏勁旅之一紐卡素噴射機入決賽，再決賽過埋威靈頓鳳凰一關捧盃。墨爾本勝利澳職歷史上，話晒都係○六至○七球季常規賽同季後賽冠軍，雖然上季跌晒Watt，但今季就落重本買人，包括向白蘭恩借用將米高菲華迪，同羅致森巴前鋒尼法比安奴。第一場就望佢趁主隊唔齊人贏波，穩陣就玩平手盤，但阿占就會進取博2.65倍客勝喇！
頂占筍盤
FC悉尼Vs墨爾本勝利
客勝
