19/11/2008
文： 朱楓
今晚熱身賽焦點之戰，唔使問一定係阿根廷作客蘇格蘭，事關馬納當拿將會首次帶領阿根廷出賽，佢上任後唔係畀人話冇經驗，就被人話同邊個不和，呢場肯定全力爭勝大反擊，以佢手頭上有阿古路同泰維斯兩大「士哥手」，睇怕傷兵滿營蘇格蘭都阻佢唔住，一於捧「讓球客勝」！（有線62周四凌晨4:00直播）
馬納當拿上個月正式成為阿根廷國家隊領隊，令全世界非常期待，可惜之後卻鬧出唔少風波，最新一單話佢被足總阻撓請練想劈炮。無可否認，馬納當拿冇太多執經驗，但勝在人氣依然，阿根廷個個都當佢神咁拜，試問邊個唔為佢賣命？早幾日佢一抵達蘇格蘭機場，就獲當地數百名球迷歡迎，預計今晚去到比賽球場會獲得更多支持，直頭可以當正自己主場踢。
阿根廷「433」博響頭炮
陣容方面，雖然阿根廷今次缺少美斯同列基美，不過馬納當拿女婿阿古路、辛尼迪、泰維斯等主力悉數入選，估計馬納當拿會打四三三陣式，賽前「球王」更表示阿根廷今場絕對唔會當熱身賽踢，希望球員全力爭勝，睇得出佢好想響頭炮。
蘇頭佐治貝利冇人撐
相比起馬納當拿，蘇格蘭領隊佐治貝利就明顯得唔到民心，上任後淪為過街老鼠，又唔識用人，搞到目前蘇超頭號射手基斯保迪都寧願退出國家隊，預計今場將會被人噓爆，最慘前鋒堅尼米拿、史提芬費查、中場費查同門將哥頓，前鋒羅斯麥哥馬克同中場占士摩利臣全部受傷唔踢得，睇怕今場就算有隊長巴利費格遜回歸，幫助亦唔大，輸少過兩球都難！
