利物浦搏“標”

利物浦在歐冠盃首回合只能與比利時球會標準列治踢和，晉級分組賽被潑一冷水，不過，今晚主場迎戰對手，仍然都被睇高一班，始終兩隊實力唔同級數，問題只係贏多贏少，但老實講，以利物浦近幾場表現水準，初盤要硬讓兩球，寧搏下盤標準列治輸少當贏。

雖然利物浦在聯賽取得兩連勝，但整體表現並未達到應有水準，上周能夠擊敗米杜士堡只贏一個“運”字，唔係對方擺烏龍及謝拉特的補時入球，利物浦至少失兩分，不過，踢歐洲賽始終都係利物浦強項，一班球星亦會加多兩錢“肉緊”，如果今仗失手入唔到三十二強的話，相信“賓帥”都可以等“炒”。

話時話又唔好太過睇低標準列治，話晒剛打敗死敵安德列治捧走比利時超級盃，跟住聯賽兩連勝，暫時在聯賽排一哥位置，差極有條數，剛果射手馬保卡尼兩場入四球，利物浦不可不防，而另一巴西前鋒甘馬高亦甚有威脅，至於塞內加爾後防沙亞及美國國腳安恩胡都防守力十足，希望可以頂得住紅軍猛烈攻勢。